සොක්කං ලොක්කං වීම හෙවත් කුල පීඩිතයෝ

මා ලියූ ‘කුල පීඩිත’ යන වචනය මගේ බොහොමයක් දේශපාලන සගයන් [විවිධ පක්ෂවල සිටින] කෝප වී සිටිනව. මම ‘කුලන් පීඩීතය’ කියා කිසිම කුලයක් ගැන සඳහන් කර නොමැති පසුබිමකයි මේ අසාමාන්‍ය කෝපය මතු වෙන්නේ. මම ‘කුල පීඩිත’ යන වචනය යොදන්නේ බොහෝම දැනුවත්ව. විශේෂයෙන් ගෙවුණු සියවස් දෙකේ දේශපාලනය කියවා ගැනීමට නම් ‘කුල පීඩනය’ තේරුම් ගත යුතුමයි.

මගේ කියවීමට අනුව පශ්චාත් යටත් විජිත රාජ්‍යයේ නායකයන් වැඩි දෙනෙක් කුල පීඩිතයන්. සියනෑ කෝරලයේ සුළු ඉඩම් හිමියෙකු වූ දොන් ස්ටේපර් සේනානායක තම තෙවැනි පුත්‍රයාවු ඩී. ඇස්. සේනානායකට උඩරට දුනුවිල වලව්වෙන් මොලී දුනුවිල බන්දා දෙන්නේත්, මහමුදලි ඩයස් සේනානායක තම එකම පුතා වූ සොලොමන් බණ්ඩාරනායකට සබරගමුවේ රත්වත්තේ වලව්වෙන් සිරිමා රත්වත්තේ බන්දා දෙන්නේත්, ඩී. ආර්. විජේවර්ධන රුවන්වැල්ලේ මීදෙණිය වලව්වේ ඇලිස් මීදෙණිය කසාද බැඳගන්නේත් කුල පීඩනයෙන් ගැලවෙන්නයි. නැතිනම් සොක්කන් ලොක්කන් වීමටයි.

සියම් නිකායේන්කෝ වෙන්වී කෝට්ටේ සංඝ සභාව, රෝහණ සංඝ සභාව හා දඹුළු සංඝව හැදෙන්නේත් කුල පීඩනය නිසයි.

මෙයට හොඳම උදාහරණය ජේ. ආර්. ජයවර්ධනයි. විවාහයක් හරහා ජයවර්ධන වාසගම උරුමකරගන්නා ජයවර්ධනලා 1969 පොතක් ලියවනව ‘ තුඩුගල පවුල’ [ The Thudugala Family] නමින්. එයින් උත්සාහ කරන්නේ විජේවර්ධනලා [ ජේ. ආර්. ගේ මව් පාර්ශවය] කෝට්ටේ 6 පරාක්මබාහුගේ ඥාතීන් බව හැඟවීමට. මේ වගේම පොතක් සේනානායක පවුලත් ලියනව, ‘පුරාවෘත්ත’ නමින්. එයින් ඔවුන් සිරිසඟබෝ රාජ පරම්පරාවෙන් පැවතෙන බව විස්තර කරනව.

ලංකාවේ බොහොමයක් වංශවල [කුල] නිල ඉතිහාසය අනුව ඔවුන් බ්‍රාහ්මණ වංශිකයන්. උදාහරණයක දුරාව වගේ වංශයක් තමන්ගේ නිල ඉතිහාසය ලියන්නේ ලම්භකර්ණ රාජ වංශයට සම්බන්ධ කරල. කරාව වගේ වංශයක නිල ඉතිහාසය අනුව ඔවුන් උතුරු ඉංදියාවෙන් පැවතෙන ශාඛ්‍ය [රාජ] වංශිකයන්.

තමන් සිව් හෙලයෙන් [ යක්ෂ, නාග, දේව හා රාක්ෂ] බව කියන්නේ මේ රටේ වංශ දෙකක් පමණයි. ඉතින් කුලය නිසා පීඩාවට පත්වෙන හැම කෙනෙක්ම [ සේනානායකලාගේ පටන් කීර්තිරත්නලා දක්වා] කුල පීඩිතයන්.

නන්දන වීරරත්න

28/06/26

පිංතුරය; මහනුවර දී සියම් නිකායේ කුල පුටු පැනවීම 2019